قعدة نسوان

طول حياتي كنت بهرب من شغل النسوان و حركات النسوان ...طول حياتي كنت بافتخر اني صاحبة الرجالة و ان الرجالة بتحبني عشان زي صاحبهم ....طول الوقت عندي انتيم راجل....طول الوقت كنت غلطانة 

أيوه طول الوقت كنت غلطانة ....عشان أول واحدة كانت صحبتي أوي و حبتها أكتر من نفسي و أول انتيم في حياتي كانت بنت ...حتى في الجامعة أول ناس قربوا مني و حبوني كانوا بنات ...

أول شغلانة في ال media وكل الأسس و حاجات تانية كتير اتعلمتها في حياتي و انا في أول طريقي كان من ست ...علمتني كتير و فتحت لي سكك كتيرة ....

أول ما اشتغلت في القنوات الفضائية أول حد اتحمس لي و حب يشتغل معايا رغم عدم اقتناعه بالبرنامج كانت مذيعة .... و أول واحدة قعدت معايا و كانت بتسعدني أحضر أفكار لأول برنامج باعمله في حياتي رغم انها كانت بعيدة تماما عن مجالي كانت بنت برضه ...

و اللي كانت واقفة جنبي و فتح لي بيتها و بتروح و تيجي بيا كانت بنت ...

دول لستة ستات و بنات عايزة أقول اسمائهم كلهم ...عشان كل واحدة فيهم ليها فضل و مش هنساه ...بس رغم تقديري الشديد للستات انما النسوان مبيخلوش من النفسنة ...فعشان كده هحتفظ بالاسامي لنفسي و هكتفي ان كل واحد تعرف نفسها بنفسها ...

خصوصا ان كلهم و الحمدلله لسه موجودين في حياتي ماعدا أول انتيمة ...لأنها قررت فجأة و بعد عشرة سنين طويلة أوي انها تقطع معايا لأسباب غير منطقية ....لكن أنا مش زعلانة 

المهم أول واحدة ساقت لي العربية و جت معايا و أنا بأعمل الرخصة كانت ست ...أما دخلت المستشفي و كنت بتعلاج في المرتين كانت ست ...

أما ببيقي من غير شغل و مكتئبة دايما في حضن ست ...اللي بيدورولي علي شغل و على أي حاجة بحتاجها ستات ...أول حد بيحس اني زعلانة و مضايقة ست ...

اول واحدة اخدتني من ايدي لدكتور دايت كانت ست ....و لسه الكبيرة بقي ان كل الكلام الحلو و المجاملات على شخصي و شكلي بيكون من الستات ...

فعلا قعدت الست بمية راجل و ان حضرت الست يغور الراجل ....ده حتى السهر و الخروج مش حلو لو مافيش ست ...

ده مايمنعش برضه ان الستات وجع دماغ في حاجات تانية كتير ...بس حقيقي لك التقدير أيتها الست وخصوصا الستات الكتير اللي عدوا في حياتي و كل واحدة سابت بصمة و آخرهم الست اللي شجعتني أكتب و أطلع اللي جوايا ....آه ما أنا نسيت أقول ان اللي شجعتني أكتب و أوجع دماغ الناس كانت ست ...و اللي بيقروا كمان يتبعوا حاجاتي ستات ...

faces

كل يوم بيعدي على الواحد وشوش ....وشوش بتعبر عن أحوال أصحابها ...

كل يوم الواحد بيدي وشوش ...وشوش بتعبر عن حالته ..

يعني في وش بيضحك ...وش بيبتسم...وش بيجامل ...وش بيكدب...

وش حزين...وش مكشر...وش غضبان....وش متعصب...

وفي وش نصاب....ووش شرير...وش حرامي...وش كسلان...وش نشيط

في وش غباء (أجرك الله).....وش غلاسة ....وش مريح ...وش متعصب...

في وش برئ ....ووش إجرام ....وش حازم....ووش حنين ....

في وش حساس....ووش قاسي ...في وش فني ...وش معبر...

في وش الجوكر....ووش المهرج....ووش الجلاد....

في وش منور ....ووش مقفهر ...ووش عليه غضب ربنا...

في ألف وش و ش ...و المفروض الوشوش بتتغير على حساب حالة البني آدم

و كمان في وشوش خداعة يعني ممكن تقول عليه وش إجرام بس هو اطيب بني آدم ممكن تقابله

يعني متتسرعش في الحكم على الوش ....

لكن بقي لنا فترة طويلة عندنا علامة مسجلة وش واحد طول الوقت أما تنزل الشارع و تبص حواليك هتشوفوا

بيتكرر طول الوقت على كل الناس موجود الوش ده ...أنا شخصيا شفته على كل سواقين التاكسي ...الناس اللي ماشية في الشارع

البايعين في المحلات ....رجالة  و ستات ...أنا حتى شفته على عروسة بتتزف...

وش مكشر و شايل هموم الدنيا و مخنوق ....أنا نفسي ساعات كتير ببقي الوش ده و بيفك بالعافية 

بس أما جربت وش تاني و بصيت بيه للناس فرق جامد ووراني وشوش وحشتنا من زمان ....لما كشفت الوش اللي بيضحك 

لقيت إنه وش الناس محتاجه و مبتصدق تشوفه عشان تنسي الهموم و تضحك 

حرقة الد(هن)

كل يوم الواحد بيصحى هادي و ساكت و رايق و مش عارف ايه اللي مستنيه بره باب الشقة ....

فابيقوم يلبس و يتشيك و خطواته بطيئة بس رايقة جدا عشان طبعا متوقع اليوم هيمشي سلسل و ظريف لأن الواحد فعلا بيقوم نيته صافية و معندوش أي استعداد لأي طاقة سلبية ولا طبعا حرقة دم ...

فتحت باب الشقة ...نزلت من بيتك ...خرجت برة العمارة ....ركبت العربية (عربيتك- تاكسي- توصيلة)...انت في الشارع ...

1-2-3 ...بدأت الطاقة السلبية في الهجوم ....زحمة ...دوشة ...عطلة...غباء...خناق ....قلة ذوق...لأ و كمان قلة أدب ....دا ايه ياربي حرقة الدم دي ....

ماهو مجرد نزول الشارع حرقة دم ....في العربية ايا كانت ملاكي أو أجرة حرقة دم....دخلت تخلص أي مصلحة في أي مكان سواء كان حكومة أو قطاع خاص برضوا حرقة دم ....ده حتى لو رحت تنفس عن روحك شوية مع أصحابك على كافيه أو في مطعم برضه حرقة دم ...(ودي تحديدا هيكون من الخدمة - الشيك- الحاجة اللي بتطلبها و متجيش زي ما انتي عايز أو تيجي متأخرة) ...

يمكن المكان الترفيه الوحيد اللي ميحرقش الدم ولا يعصب هو السينما ...عشان ببساطة عارف معاد الفيلم بتروح تختار بنفسك المكان اللي هتقعد فيه تتفرج خلص الفيلم مشيت ........اممممم أنا أسفة حتى دي فيها حرقة دم و قلة مزاج عشان ( عيل بيعيط بلا توقف- تيلفون بيرن بنغمة لا تكذبي أو اللي جاي أحلى - ناس بتضحك و الفيلم رعب- أو ناس بترغي في فيلم كله حوار نافيش فيه مناظر فامحتاج تركيز)....

طيب انا عندي اقتراح مفيد لكل الأطراف احنا ممكن نحول الطاقة السلبية دي و حرقة الدم لحاجة مفيدة جدا وهى حرقة دهن ..أيوة ده صحيح أنا قلت حرقة دهن ...أهو بكده الواحد ممكن يخس بدون أي تكاليف زيادة و لا حتى وش ال diet و ال gym و غيره و كمان مش مضطر تتدفع دم قلبك عشان تخس و برضه مش هتخس زي ما انتي عايز فاهيتحرق دمك ...

كده ممكن تخس طبيعي و من غير ما تركز ....عشان ببساطة اتضح انك أما تركز في حاجة أوي بيحصل العكس ...ومش قصدي تركز في عمايل الحاجة قصدي أما تركز انك عايز حاجة ....لأن لو كل واحد ركز في اللي بيعمله أكيد كنا بقينا من دول العالم الأول...

المهم لو ركزنا و احنا نزلين من البيت و هنشوف الشارع ان أي حاجة هتحصل دي مفيد لينا و لحرقة الدهن ....افتكر النتيجة هتكون ممتازة و هتخف شوية من الضغوط العصبية و أمراض القاولون و الضغط و السكر و هتركز في حاجة تانية مفيد انها تتحرق و هى الدهون ...و الله الموفق و المستعان و ربنا يقدرنا على حرقة الدهن 

يوم سواقة عادي جدا

أنا في يوم سواقة عادي جدا ...بنزل اركب العربية ..اسخنها لو عندي وقت لو معنديشيامشي على طول ...يبدأ اليوم براحة جدا لحد أما اطله من شارع بيتنا و ادي اشارة شمال اني هاعدي تقاطع و امشي في شارع اتجاه واحد .....كل ده سليم ....الواقع بقي اول ما ادي الاشارة الشمال و ابدأ عايزة اعدي ....و طبعا مير محدش بيدي فرصة لحد يعدي ...ده غير ان فكرت الاشارة غير معترف بيها زي ما وضحت للجميع قبل كده...فالحوار بيمشي كالأتي:

ممكن اعدي ....خلوني اعدي يعني مش كده ....اففففف....استغفرالله العظيم ....( عديت بعد معاناة و دخلت الشارع الاتجاه الواحد و طبعا يا واحد راكن صق تاني و سده يا واحد داخل عكس)

باقي الحوار:

انت داخل غلط على فكرة .....أبو شكلك (ده أنا بس كده باسخن)....مش هعديك عشان انتي داخل الغلط ...متحلمش اني ارجع سم...(اتحلت الأزمة كملت طريقي و طلعت الشارع الاتجاهين وواحد جاي في وشي و كأني في العربة الخفية)

هو انت مش شايفني مثلا...أبو شكلك ( لسه في مرحلة التسخين) ...

المهم وصلت الاشارة اللي بعدها تقاطع و الدنيا دايما ملخبطة فيها و بدأت مرحلة التحدي 

الحوار: 

ياللا بقي عدووو....اففففففففففف....يعني يلعن أبو البطء ( بدأنا الأكشن و سخنا كفاية)

خلصت الكوبري و داخلة يمين اللي هو أصلا مش المفروض يكون واقف لكن نقول ايه هو في حاجة بتمشي بسهولة 

الحوار : 

ياللا اعدي ...اخلصوا انا داخلة يمين ....ذنبي ايه طيب اقف الاشارة كلها ...يا ساتر ...

طول الطريق بقي عشان اليوم طويل و كله زي بعضه واحد يكسر و احد يزنق واحد يكلكس واحد بطئ ميكروباس ب..طئ برضه عشان الرقابة أنا بقي لغة الحوار عندي بتختلف و بتدخل في مرحلة الأكشن  hard core و بتبقي كالأتي 

ماتيجي على رجلي احسن ....اتفضل 

يالللا يا (تيت ) .....يعني (تيت أم اللي ركبهالك يا شيخ) .....يلعن أبو (تيت تيت) ....انت حمار بديل انت عارف كده و لا مش عارف ....ما تبص قدامك يا (تيت) ....

ملاحظات:

ده يوم سواقة عادي جدا ... بينتهي مع نهاية الزحمة عشان طول ما الشارع فاضي للأسف ببقي ساكت و سرحان و تقريبا العربية بتمشي للبيت لوحدها و مافيش اي أكشن بيتم بليل 

في يوم سواقة مش عادي بنزل مبقولش حاجة غير ممكن و مش أكيد استغفرالله العظيم لو مثلا الاشارة قفلت عليا مرتين 

آخر حاجة الحوار كله بيتم بيني و بين نفسي و الشباك مقفول لكن مقفول أو مفتوح مش فارقة عشان وشي ماشاءالله بينطق لوحده و معبر جدا عن كل الالفاظ اللي بقولها متوصاش يعني

المهم كل اللي حواليا بما فيهم أنا متأكيدين ان السواقة هتجيب أجلي سواؤ في قسم شرطة أو جثة مشوهة على ايد على (ابن تيييييييييت)

sorry

سايس لكل مواطن

مش عارفة ليه بنشتكي من البطالة و ان مافيش شغل ....مع ان البلد كلها بتشتغل شغلانة مربحة جدا و ملهاش مواعيد و لا قوانين ...شغلانة السايس ...أيوان شغلانة السايس ...بقت منتشرة في كل حتة بقت بتعين رجالة و ستات ...مواعيدها شفتات ...و حاجة يعني زي الفل ...لأ و ايه الربح السريع ...مش مضطر تستني لآخر الشهر أو حتى لأخر الأسبوع و لا لآخر اليوم انت بتقبض في ساعتها...و طبعا زيها زي أي شغلانه تانية فيها مستويات 

يعني لو بتركن في شارع عادي قدام كشك مثلا (نص جنيه- جنيه ) 

لو بتركن في مكان هاي كلاس قدام مطعم - محل - حاجة هتكع فيها جامد (5 حنيه يا معلم ده minimum)

لو بتركن بقي قدام مكات سهر أو أوتيل أو حاجة لبسك مكلف فيها جامد و نازل من عربية فخمة شوف انت بقي ......

تعالي بقي بعيد عن الأرصفة و الشوارع و ادخل احترم نفسك و اركن في parking ماهو انت كده دافع و كده دافع ....اعمل حسابك بقي انك هتدفع بالساعة على الباب بره و هتدفع لكل صبع يشاورك لك جوه يعني في budget محترمة اعمل حسابك فيها لأقل نزولة حتى لو كنت نزلت تتمشي بعربيتك و راجع تاني ...خد بالك ممكن واحد غريب عن المنطقة يعملك فيها سايس و يحسابك على الركنة قدام بيتك ....

انا مش قصدي أقلل من قيمتهم بالعكس هما مفيدين جدا في أوقات وأماكن كتيرة .....لكن لكل شئ حدود و اللي يزيد عن حده يتقلب ضده ...فكفاية أوي علينا سايس لكل منطقة مش مواطن ...

دي اشارة يا كابتن مش غمزة

في option في العربية اسمه اشارة...الغرض منه انك لو عايز تدخل يمين في ضهر العربية لمبة بتنور يمين و في الجنب و من ثدام كمان ...و لو عايز تدخل شمال نفس القصة ...أما بقي لو مضطر تقف لأي سبب من الأسباب وقوف مؤقت بتنور الاتنين عشان لو حد جاي بسرعة يفهم ان واقف مش ماشي ....كل ده كلام جميل أوي و حاجة يعني عبقرية و متعارف عليها من زمان مش لسه عارفنها امبارح المغرب ....

طيب معني الاشارة في مصر ايه بقي ....زهو ده الجديد الاشارة في مصر بالنسبة للسايق وراك يعني عدي و مش معترف بيها ....ده غير انك ممكن تدي اشارة يمين و عادي جدا تدخل شمال ....و لو اديت انتظار عشان هتركن ده معناه ان الشارع كه يكبس عليك و يخنق عليك و تبقي في أوسخ اختبار سواقة (ورينا شطارتك هتركن ازاي في الضيق ده يا متعلم يا بتاه المدارس)

طيب لاغينا ال option العالمية ده... بنتعامل ازاي ....لأ دي سهلة أوي

1- لو انت سواق اتوبيس بطلع صوابعك مالة على الشباك و تحدف مكان ما انت عايز ماهو انت الكبير ...و الكبير كبير برضه 

2- لو انت سواق نقل بطله صوبعك و كأنك بتأمر الناس تستني عشان انت قررت تعدي 

3- لو انت ميكروباص  بطلع التباع عشان دي من مهام و ظفيته 

4- لو انت ملاكي ممكن تطلع دراعك أو رجلك أو عيل من عيالك عشان الناس تقتنع انك داخل يمين أو شمال 

لكن في واقع تاني خالص بيتم انك لو قررت تدخل يمين أو شمال من غير ما تطلب اذن أو تنبه أي حد عادي جدا الجميع بيتقبل قرارك بصدر رحب لأ و كمان بيحترمو ...

إذا ما هى الاشارة في هذه الحالة؟ّ!

لسه معرفتش يعني ايه اشارة في مصر ...هى وسيلة من وسائل الشتايم الفعالة و المؤثرة و اللي ممكن تتسبب في مجزرة ...يعني سلاح فتاك بس بيستخدم في أوقات حساسة جدا و مع اللي يستهالو فعلا ....

عموما انا لاقيت حل لطيف لموضوع الاشارة و مش مكلف ابدا بدل ما نستهلك اشارات العربيات الغير مفهومة احنا هيكون معانا يفط بعصيان كده مكتوب عليها (داخل يمين - داخل شمال - واقف) وبكده ممكن نتجنب التزنيق و الفهم الغلط و نرجع السكينة للشارع المصري ......

اللي اتكسر يتصلح

جملة يعني لو ركزت فيها هتلاقيها مستفزة لأبعد الحدود....لأن مافيش حاجة اسمها اللي اتكسر يتصلح ....ماهو أكيد لو كان بالسهولة دي مكنش حد زعل على الحاجة اللي بتكسر ...و دايما بتيجي من اللي بره الموقف ...هو محدش خد باله انه حتى لو اتصلح هيفضل في شرخ أو علامة و دي اللي هتفضل تفكرك باللي اتكسر و ليه اتكسر و ازاي اتكسر؟!

حاجات كتير بتتكسر و ماينفعش تتصلح ...شخصيات بتتكسر ...علاقات بتتكسر... بني آدمين بتتكسر ...كل دول هيتصلحوا ازاي أكيد لسه مافيش أمير خاص بالمشاعر و العلاقات و النفسية يصلح ...

عشان كده الأسلم أن اللي اتكسر يدشدش و نجيب غيره و نأخد حاجة جديدة على نضافة و نفكر ألف مرة ازاي نحافظ عليها عشان منضطرش نكسر و نصلح و نشوف شروخ و علامات هتضيقنا طول عمرنا ...

أنا اتكسر فيا حاجات كتير و كل مرة كنت بحاول أصلح لكن خالص في حاجات من كتر التصليح و الشروخ شكلها بقي وحش و مينفعش تفضل كتير على الوضع ده ....فعلا أنا اللي اتكسر جوايا مج مش كوباية ..آه والله ...

نفسي بس اجمع البواقي و ألمها و أرميها في الزبالة عشان أعرف أجيب جديد و أحاول أحافظ عليه ...و نفسي برضه ان اللي كسرني يركز انه يصلح أو حتى يجيب جديد و يحاول يحافظ عليه و يعمل شوية مجهود ..عشان مش كل اللي بيتكسر أساسه متين و ينفع يتصلح و لا كل اللي بيتكسر (متوفر في الأسواق) و سهل يتجاب غيره ...في حاجات بتبقي نادرة و صعب تلاقيها تاني ...

عشان كده بنزعل أما بتتكسر و بتقهر أما بنسمع اللي انكسر يتصلح !!!

بدون عنوان

حالة من الاحباط و الحزن الشديد ....ده ملخص حالتي بس مشاعر مختلطة يعني مش قادرة أحدد السبب هل هو حالي و لا حال البلد .. 

يعني كنت مقاطعة الاخبار من مدة طويلة على أمل اني أبعد عن أي طاقة سلبية و مستسلمش و محسش ان مافيش فايدة و مافيش أمل ... لكن بسبب حالة الفراغ اللي انا فيه و عطلت الشغل الغير مبررة ....أو لأ الحقيقة هى مبررة بحال البلد ...اضطرت ارجع تاني اتابع الأخبار و اول ما أفتح أفتح على حرايق و دمار ...

السؤال هو : ليه طب هو انت أما تحرق و تخرب و تدمر هتستفيد بإيه ؟؟؟

بتعبر عن غضبك و توضح وجهة نظرك و تعلن اعتراضك ؟؟؟؟

طب هل الطريقة دي أثرت قبل كده و جابت نتيجة ؟؟؟

هو مش طول السنتين اللي فاتوا كان فيه خراب و دمار ؟؟؟

طب ايه اللي اتصلح بعد التعبير العنيف السريع ده ؟؟؟

من حقك تعترض ...من حقي أعترض...من حقنا نعترض ... 

من حقك تغضب....من حقي أغضب...من حقنا نغضب ...

لك وجهة نظر...ليا وجهة نظر....لينا وجهة نظر ...

بس فكرت قبل ما تتسرع و تنفس عن غضبك ايه العواقب و النتايج اللي هتترتب على أفعالك؟؟؟

فكرت بنسبة كام في المية أفعالك هتأثر و تجيب نتيجة؟؟؟؟

فكرت في ردود الأفعال اللي هتكون نتيجة لأفعالك ؟؟؟

مش مطلوب تسكت و لا تبقي سلبي و تعمل نفسك مش واخد بالك أو يبقي عندك لامبالاة و ايكش تولع ....لكن مطلوب منك تفكر فيما بعد اعتراضك و غضبك ... ماهو المحروق بيفضل محروق و أكبر دليل مبني الحزب الوطني ... و المتكسر هبفضل متكسر و ادي الشوارع كلها تشهد ... و اللامبالاة مبقتش منا بقت من الجهة اللي بنعترض عليها و على أفعالها ..

يعني من حقنا نعمل واقفة مع نفسنا و نفكر ازاي ممكن نحل طلما العتف مش جايب همه و قبل مانخلص و ميبقاش في حد يعبر و يعترض و يغضب 

a massage for God

أنا من أكتر الناس اللي مقتنعة ان علاقتي بربنا بيني و بين ربنا .....و إنها أهم علاقة في حياتي كلها ....لكن حسيت من من أهم الحاجات اللي كان لازم أفكر أكتبها أول ما قررت أكتب اللي جوايا و أطلع أفكاري بره دماغي هى ال massage دي ....

أنا عارفة ان ربنا الوحيد اللي عالم باللي جوايا كله و سمع صوتي و بيقرا أفكاري حتى من قبل ما أقولها ....لكن ده ما يمنعش اني أشكره في السر و العلن ....و بدل ما أكلمه و بس كمان اكتب له ...ماهو ما فيش حاجة تمنعني إني أتب لربنا لا هو عيب و لا حرام ...

عشان بكتبلك يا رب ... باكتب و أقولك محتجالك في كل وقت ...و في الوقت ده تحديدا .... عندي وجع غريب في قلبي رغم اني متأكده إن ما ضقت إلا مافرجت ...و إن مع العسر يسرا ...و إن أي ابتلاء ده نعمة من عند ربنا عشان ده معناه إنه فاكرني و حابب يسمع صوتي ...

كمان عارفة إن الله مع الصابرين و ان مافيش باب ربنا خلقه إلا أما خلق له مفتاح ....و مؤمنة تماما بإنه محدش بيأخد أكتر من نصيبه و لا أقل ....و في كل ثانية بأشكر ربنا على النعم اللي أنا فيها لأن و الحمدلله أنا في نعم متتعدش كفاية اني مافيش فيا أي عاهة و الحمدلله ...و كفاية حب الناس اللي حواليا ...و كفاية إن مافيش أزمة اتحطط فيها إلا أما كان في حاجة بتهونها عليا ...و كفاية عيلتي و أصحابي و ولاد الحلال اللي في كل حتة ...

في ناس أما تقرأ الكلام ده حتحس اني over و ناس هتقول ايه التمثيل ده و ناس تانية هتقول طب و احنا مالنا ما تخلي كلامك لربنا بينك و بين ربنا ...أنا بقي بأقول (فأما بنعمة ربك فحدث) 

و كمان بقول إن مش دايما اللي يتكتب هو الوحش ....لازم زي ما بنطلع الكآبة اللي جوانا و الخنقة و الأرف نطلع كمان الحلو ...."ماهو مش كله ضرب ضرب .." و أنا مش رسامة صورة وردي أنا برضه بأشكي لكن بطريقة تهون الوجع اللي الواحد فيه ...بصبر نفسي يعني عشان حقيقي الكآبة وحشة و بتقصر العمر أكتر ماهو قصير ....الحمدلله على نعمة الصبر 

صباح الخير انا نازل استشهد

هو أنا بيتهيألي ولا الناس بقت بتمشي في الشوارع و هى طالبة الشهادة و مبقتش حياتهم فارقة معاهم ....يعني أنا مش قادرة أحدد هل دي لا مبالاة ولا بما ان كلمة شهيد بقت بتتكرر كتير على مدار السنتين اللي فاتوا فالناس فاكرة ان أي موتة هتتعرض لها هيطلق عليهم لقب شهيد في شهادة الوفاة ....

يعني السؤال بطريقة أوضح عشان مبقاش ظالمة حد الناس اللي بتوقف على مطلع الدائري عشان تركب مواصلات و الناس اللي بتعدي الطريق السريع و الناس اللي بتتمشي و الاشارة مفتوحة عند هايبر أوكتوبر و الناس اللي بتمشي وسط العربيات بالطول و كأنهم هيخترقوا العربية ....لأ و الناس اللي بتقرر انها تنزل من عربية في وسط طريق سريع و اللي بيصدر عياله للعربيات و هو بيعدي الشارع هل كل دول في دماغهم انا نازل أموت شهير و لا دا تأثير أفلام الأكشن الكتير اللي هيوليوود غرقتنا فيها ولا ده نوع من أنواع الاستهتار و ماشيين بمبدأ ما تخلي بالك انت ...

يعني لو حد من دول اتخبط لازم يكون الغلط على اللي سايق انه مشفش الجثة اللي بتعدي و نزعل و نلوم على الحكومة و نبهدل الدنيا طب ليه ...ليه مبنخفش على حياتنا و نحاول ناخد بالنا بدل من لوم غيرنا ...يعني لو ماشي على الرصيف استحالة عربية تيجي مخصوص تخبطك و تنزل تاني 

لو بتعدي و الطريق فاضي استحالة عربية تيجي من آخر الدنيا تخبطك ماهو مش need for speed يعني اللي احنا عايشيين فيه و مش من الفراغ اللي في الشوارع البلد زحمة و بتزيد زحمة كل دقيقة و مبقاش فيه مكان فاضي يستحمل عجلة 

و عشان مبقاش طبقية مش بس الناس اللي ماشية على رجليها هى اللي طالبة الشهادة كمان الناس اللي في العربيات واضح انها يا طالبة الشهادة يا طالبة فلوس التأمين عشان مش طبيعي ان احنا في بلد كل شوارعها اتجاه واحد و احنا مبنعملش حاجة غير اننا نمشي عكسي و بس و برضه في الاماكن اللي مينفعش تماما ان احنا نمشي عكسي فيها أو نكسر اشارات ... زي تاني مطالع الدائري و الطرق الصحرواي و السريعة و الكباري ...

احنا البلد الوحيدة اللي  عملت اشارة في طريق سريع و مطبات على كوبري أفتكر و مطبات في parking المولات و في الشوارع الجانبية الضيقة و لو ان المطبات دي المفروض عشان تهدي السرعة فالحقيقة مش قادرة أفهم مين هيجري في ال parking إلا اذا كان بيستعرض أو مشارك في رالي الفراعنة ....

نصحتي للمسئولين عن الشوارع و المرور عشان نتجنب الظواهر الغير مفسرة بقي لها فترة:

1- نلغي اشارات المرور و نوفر سحب كهربا على الفاضي و نحولها لشاشات عرض اهي تسلي الناس في الزحمة و ممكن كمان تكون هى سبب من أسباب الزحمة و ممكن نكتفي بعسكري المرور لو متأزمين أوي و محتجين حد يقوفنا و يحركنا و لو ان ده كمان ساعات كتير بيعطل ما بيقدمش خصوصا اللي بيقفوا على الكباري رغم ان المتعارف عليه ان الكباري اتعملت عشان نهرب من زحمة الشوارع و ان احنا اكتر بلد فيها كباري 

2- نبوذ على الشعب فرحة انه يمشي عكسي و نخلي الطرق كلها رايح جاي و بكده هنتجنب الأفش و برضه هنتجنب الزحمة الغير منطقية بسبب ان واحد داخل غلط و مصمم يرجع 55 واحد داخلين صح و ممكن كمان ينزل يبجح و يتخناق 

3- نلغي الرصيف بما ان الناس مش بتستعمله و بقي عبارة عن سويقة و بكده منقدرش نلوم الناس انها ماشية في الشارع مش على الرصيف و في نفس الوقت هنوفر مساحة أوسع و بالتالي العربيات هتلاقي مكان تركن فيه بدل ما بنركن صف عاشر و نضيق الدنيا على بعض و برضه نبجح في بعض و نتخانق 

بالتلات حلول دول ممكن نخف شوية الزحمة و نخفف كمان عدد الشهداء و نفوت الفرصة على بعض ان احنا نتخانق و نضيع نص عمرنا بنزعق و نوقف الطريق زيادة أكتر ماهو واقف لأن الخناقة في الطريق للأسف أو الحادثة أو أي غلطة مبتبقاش بين اتنين بس بتيجي على دماغ الكل يعني لو الطريق وقف في شارع مصدق عشان اتنين اتخنقوا العطلة بتوصل لمحي الدين ...

حياتي هى كل حاجة و عكسها ...شخصيتي كمان كل حاجة و عكسها ....المفروض اني برج القوس بس اللي أنا عيشها و شايفها اني برج الجوزاء بكل المعاني....

يعني بحب الطبخ بس أكلي كله بره البيت حتى و أنا في البيت برضه باكل من بره ...بحب النظام بس بأكره أنضف لكن مقدرش أعيش في مكان مبهدل و مش نضيف...بكره الناس المكشرة و المتعصبة في السواقة و الشارع بس مبستحملش الهوا يجي جنبي و أنا سايقة و دايما طول ما أنا في الشارع مكشرة ...(واضح انها عدوى) 

عندي أصحاب كتير و طول الوقت بشتكي من الوحدة ....كل أما باب رزق يتقفل ربنا بيفتح غيره في ساعتها بس طول الوقت انا متوترة و خايفة على رزقي ....

محبش اللي يتأخر عليا بس أنا دايما مواعيدي ملخبطة ...بأكره التدريس و انهاردة أديت أول درس خصوصي لصديقة مش مصرية و كمان درس عربي (سبحان الله) ...لأ و حبيت الموضوع مع اني طول حياتي كنت ضده و خايف يكون آخرتي مدرسة ( فعلا محدش يعرف الخير فين )...

شغلتي قايمة على الكتابة و دي أول مرة في حياتي أطلع أفكاري و الكلام اللي دايما بيدور في دماغي و بس بره و أقرر ان كفاية كبت و لازم انفس عن نفسي شوية و ان دماغي ترتاح من التفكير 

انهاردة أول مرة أعرف اني أقدر أعمل حاجات كتير و اني أقدر انفذ أفكار بسيطة لكن هتفرق معايا كتير ...طول عمري كنت فاكرة اني عايشة عشان شغلي اللي بحبه و بس و اني مش هأعرف أعمل أي حاجة تانية بره مجالي ....انهاردة اكتشفت ان المجازفة حلوة و ان الأحلى ان الواحد يجرب مجالات تانية غير مجاله لأن التغيير مطلوب و مفيد حتى لو كان غير اللي احنا عايزينه ....لأن كل حاجة بتحصلنا بتحصل لسبب يعني أنا مثلا كنت محتاجة تغيير عشان كده معنديش أي مانع اني أجرب و اتعلم و يا أنجح يا أفشل مش مشكلة المهم كفاية شرف المحاولة ...

ودي أول محاولة و أول حاجة بكتبها و يا نجحت يا فشلت مش مهم ...المهم انها طلعت و من غير تفكير و لا اعادة كتير