حياتي هى كل حاجة و عكسها ...شخصيتي كمان كل حاجة و عكسها ....المفروض اني برج القوس بس اللي أنا عيشها و شايفها اني برج الجوزاء بكل المعاني....

يعني بحب الطبخ بس أكلي كله بره البيت حتى و أنا في البيت برضه باكل من بره ...بحب النظام بس بأكره أنضف لكن مقدرش أعيش في مكان مبهدل و مش نضيف...بكره الناس المكشرة و المتعصبة في السواقة و الشارع بس مبستحملش الهوا يجي جنبي و أنا سايقة و دايما طول ما أنا في الشارع مكشرة ...(واضح انها عدوى) 

عندي أصحاب كتير و طول الوقت بشتكي من الوحدة ....كل أما باب رزق يتقفل ربنا بيفتح غيره في ساعتها بس طول الوقت انا متوترة و خايفة على رزقي ....

محبش اللي يتأخر عليا بس أنا دايما مواعيدي ملخبطة ...بأكره التدريس و انهاردة أديت أول درس خصوصي لصديقة مش مصرية و كمان درس عربي (سبحان الله) ...لأ و حبيت الموضوع مع اني طول حياتي كنت ضده و خايف يكون آخرتي مدرسة ( فعلا محدش يعرف الخير فين )...

شغلتي قايمة على الكتابة و دي أول مرة في حياتي أطلع أفكاري و الكلام اللي دايما بيدور في دماغي و بس بره و أقرر ان كفاية كبت و لازم انفس عن نفسي شوية و ان دماغي ترتاح من التفكير 

انهاردة أول مرة أعرف اني أقدر أعمل حاجات كتير و اني أقدر انفذ أفكار بسيطة لكن هتفرق معايا كتير ...طول عمري كنت فاكرة اني عايشة عشان شغلي اللي بحبه و بس و اني مش هأعرف أعمل أي حاجة تانية بره مجالي ....انهاردة اكتشفت ان المجازفة حلوة و ان الأحلى ان الواحد يجرب مجالات تانية غير مجاله لأن التغيير مطلوب و مفيد حتى لو كان غير اللي احنا عايزينه ....لأن كل حاجة بتحصلنا بتحصل لسبب يعني أنا مثلا كنت محتاجة تغيير عشان كده معنديش أي مانع اني أجرب و اتعلم و يا أنجح يا أفشل مش مشكلة المهم كفاية شرف المحاولة ...

ودي أول محاولة و أول حاجة بكتبها و يا نجحت يا فشلت مش مهم ...المهم انها طلعت و من غير تفكير و لا اعادة كتير