خدمة حرق دم العملة

اسمها : خدمة العملة 

المكان: كل الشركات الكبري 

الزمان: متوفرة 24-7 

الغرض: حل مشاكل العملاء و الرد على استفسارتهم 

الحقيقة: هى خدمة مزودة لحرق دم العملاء و مص دمهم ورفع ضغطهم 

أكتر مغامراتي مع خدمة العملاء بتاعت فودافون ...مشاء الله عليهم حافظين مش فاهمين ...يعقدوا و يعصبوا و ميحلوش 

قاعدين يقبضوا من الفلوس اللي بيسرقوها منا و بكل بجاحة ردودهم بتقولك اخبط دماغك في الحيط مش هنحل ...

يعني انا أفهم أما الناس تشتكي و الشكوى تتكرر نحاول نحل مش نسمع نفس الكلام و نستفز العملاء...

أما فين الجملة الشهيرة بتاعت الزبون دايما على حق ....الناس دي بتحالو تتطلع الزبون دايما غبي و الشركة على حق 

الغريبة ان كل مكالمتنا مسجلة ...السؤال مافيش حد بيراجع المكالمات دي و بيحاول يوصل للمشكلة اللي بتعصب العملة و يحلها 

هما بس معتقدين انهم أما يتكلموا كويس كده بيهدوا الزبون ...مش عارفين انهم ممكن كده يشلوه ...

اسمها خدمة العملاء ...يعني موجودة عشان تخدم العملاء..و بياخدوا فلوسهم من العملاء...و عايشيين على قفى العملاء...يعني لو مافيش عملاء...مافيش خدمة....مافيش شغلانة ....مافيش فلوس 

يا تحسنوا خدمة العملاء و تخلوها في خدمة العماء مش خدمة الشركة ....يتلغوا الخدمة و تفروا فلوسنا اللي بتروح كده كده لدكاترة القلب و السكر و الضغط اللي هما المستفيد من خدمة العملاء بشكل مباشر 

waiting

من اكتر الحالات اللي بتعصب فعلا هى الانتظار ...يعني لو شفنا من أول الحاجات التافه اللي بنتحط فيها في حالة انتظار لحد القرارات المصيرية ...

يعني ممكن تتحط on hold أو على waiting في التليفون مع خدمة العملاء - أصحابك - مكالمة شغل- حتى وانت بتطلب أكل ..

ممكن تبقي waiting list في المطار أو حتى في مطعم و كمان عند الدكتور 

ده حتى و انت بتعمل shopping بتقف طابور طويل منتظر دورك عشان تدفع فلوس ياريتك هتاخد حتى ...

و انت برضه بتبقي مستني مرتبك كل شهر يعني في حالة انتظار ..و مستني فاتورة الكهرباء و مستني الايجار و مستني المياه و مستني الغاز ..آه ماهى الحاجات دي مينفعش تستني زيك ...

بتستني المسلسل التركي ...و باسم يوسف و فيلم حلمي الجديد ...بتستني نتيجة ماتش الاهلى و الزمالك ...

بتستني نتيجة التحاليل...و تستني تشخيص الدكتور....حتى وقت الولادة بتستني تعرف ولد و لا بنت حتى لو عارف من الأول برضه بتستني ...

بتستني الصبح يطلع و يجي يوم جديد ...بتستني الليل يهل عشان يخلص اليوم بحلوه و مره ..

بنستني نتيجة الامتحان و نتيجة الثانوية العامة و نتيجة مكتب التنسيق و القوى العاملة 

بنستني ربنا يفرجها و يسترها و يحلها من عنده و يكرمنا ودي الحاجة الوحيدة اللي نتيجتها مضمونة 

أنا بقي حياتي كلها في حالة انتظار ....مستنية تليفون يفرحني أو يطمني 

مستنية واحد معين يعبرني و يسأل عني و دايما بيجي اللي مستنياه من العكس 

مستنية شغلانة جديدة ...مستنية الفرج ...مستنية فلوس ...مستنية أخف ...مستنية ....مستنية ....مستنية.....مستنية.....مستنية....مستنية

لحد آخر نفس هافضل مستنية ....هأعيش مستنية و أموت مستنية ...ماهو حتى بعد الموت بنستني الحساب و نستني نتيجته 

و ربنا يسترها و يرحمنا 

خرم مناخيري !!!!!!

مكنتش عارفة ان مناخيري ممكن تسبب لي أزمة في حياتي و تأخد وقت و حجم أكبر من حجمها ...خصوصا و انها بشهادة الجماهير صغيرة ....

لكن عشان مظلمش مناخيري ...خرم في مناخيري هو اللي واخد حيز كبير أوي من تفكيري و اهتمامي و جذب اهتمام كل اللي حواليا بما فيهم ماما ....

الحكاية بدأت كالأتي ...كعادة كل البنات أما بتكتئب ولا بتمر بظروف صعبة بتلجأ دايما للتغير و الجديد ...و ده بيتم دايما في الشكل...يعني قصة شعر ...لون شعر...لبس جديد ...و في بقي ال extreme نبدأ نخرم في نفسنا ...يعني في الودن الواحدة 16 خرم ...في الحاجب ...فوق الشفايف أو تحتها ...في المناخير ...في البطن...في اكتر حاجة بتوجع بس أما تبصلها فمابالك تعملها و هى اللسان.. 

المهم أنا زي أي بنت روحت أغير و اخترت خرم المناخير (للي مايعرفنيش كويس أنا بخاف أصلا من شكت الدبوس و بورم من قرصة الناموسة) ...المهم أما أجى أقرر أوبصراحة مقررتش كنت مترددة بس أعلنت قدام أصحابي اني بأفكر أي خرم مناخيري ..و سبحان الله كأني قررت احترف في فريق برشلونة ...لاقيتكمية تشجيع مرعبة و كأن الناس كلها مستنية اني أخرم مناخيري ...وكأن خرم مناخيري ده هيحل مشاكل كتير ...

وفي يوم سبت و بعد غدا لطيف و أكل حلو أوي مع أصحابي لاقيت صحبتي اللي هى صاحبة البيت واخدني من ايدي و على الحمام و قررت تخرم لي مناخيري بنفسها و بأكتر الطرق الوحشية بالنسبة لي ...ثبتتني و راحت دابة ابرة عاملة زي المسمار في مناخيري و طبعا الاحساس وصلكم ....بعيد عن حنفية الدم و الدوخة كان عندي حالة ضحك هيستيري غير مسببة ...(ياللا الحمدلله أنا كنت فاكرة اني هاقع من طولي ..أصلا أنا دمي عزيز عليا أوي ) 

عدى اسبوع و احنا حاطين الحلق المؤقت و أنا موجوعة شوية بس من كتر ما شكل الحلق حلو بدأت أطمع اني أغيره و أحط حاجة تانية بقي ...عايزة أدلع بقي ...

هى هى نفسها صحبتي كانت معايا و انا بأغير الحلق شلت المؤقت و جايه أحط التاني و المفاجأة ...الحلق مش عايز يدخل للآخر ...ممممم لحظة فضول عن الصديقة بدأت تبص جوه مناخيري و تحط صوابعها و تدوس عليه و أنا طبعا متبهدلة ...وصلنا لنتيجة ان نص الخرم اتسد ...فأنا هسيب الحلق كده لحد ما نشوف حل ...

فضلت كده أسبوع كمان على آخر الأسبوع قلت طب أجرب حلق تاني ...بدلت الحلقان و فوجئت بقي بالجديد اني كل أما اتنفس يطلع ..أقوم ضغطاها و ارجعوا بالعافية ...لحد ما فجأة بقيت شبه الأرجوز مناخيري حمرا جدا و متعصبا أوي و مش طايقة نفسي فقررت أنا و أصحابي طبعا عشان خرم مناخيري دا حدث مهم في حياتي طبعا اني أشيله و أروح لدكتور يعمله صح ....

فعلا حصل شلته و بعدها ب 4 أيام و بعد طبعا ما أصحابي كلهم حصروا الدكتور المختص عشان نعرف معاده و نروح ...روحت أنا و وواحدة صحبتي تاني ...و كنت مترددة أكتر من الأول ...دخلت في أقل من ثانية خرمت الخرم الصح و حطيت حلق أكبر من فتحة مناخيري اللي بتنفس بيها ...

الدكتور قالي الحلق ده تشليه بكرة ...صحبتي قالت لي لأ ده بعد 4 أيام كده ولا حاجة و جابت لي حلقين تانين عشان أما نغير ...و احنا لسه في الحدث المهم و هو خرم مناخيري و ناس تتصل تسأل عليا و ناس تطلب صور ليا و حوار ...

بعد 4 أيام جبت العدة للتغير و روحت لأصحابي في كافيه مشهور أوي مصر كلها بتقعد عليها و قرروا جمعيا المشاركة في تغيير الحلقة ....واحدة منهم دكتورة اتعملت بقلب جامد و راحت دابة الحلق بكل قوتها و انا عاملة أصوت لحد مابعدوها عني بالعافية ورحت ألحق نفسي لقيت الجميلة بتدب الحلق في الخرم القديم المقفول ...(آه يا مناخيري )

بعد محاولات من كل الجهات و بعد ما الزمالك كلها حشرت مناخيرها في خرم مناخيري و بعد ما بوظنا حلق و دمرنا حاجات و جبنا بنج و كريم مضاد حيوي و قطن و شاش و قلبنها مستشفي ميداني صغير لمناخيري قدرنا الحمدلله نغير و نحط واحد كويس و شكله حلو ...

أنا روحت تعبانة و فضلت شوية موجوعة و خلصت خلاص كده الحمدلله....لأ مخلصتش خالص ...عشان ماما معجبة أوي بخرم مناخيري فنزلت مخصوص تشتري لي حلق حجمه برضه أكبر من فتحة مناخيري و مصممة انه حلو أوي عليا و انه عشان بمغناطيس هيوفر التعب ولا محتاجة أخرم و لا حاجة (حبيبتي حتى انتي شايلة هم الخرم) ....على فكرة مش خلاص لسه عشان my best friend اللي كان لسه أول مرة يشوف خرم مناخيري و عجبه حب يختار لي حلق جديد أحطه و لما روحت قررت أغير و أحط الجديد عشان شكله عجبني أكتر ....برضه بنج و كحول طبي و قطن و شغلانة ...المهم النتيجة اني ورمت مناخيري و نزفت تاني و عندي صدع نصفي و أما بتنفس موجوعة و احنا لسه في مشكلة مناخيري و خرم مناخيري اللي بقت أهم من أزمة السولار دلوقتي 

ومن عجائب الشعب المصري ان وحياة أمك شتيمة و رحمة أبوك توسل

قاموس الشتايم المصري مبدعين أوي فيه ..مش بس كده فخورين كمان بيه ...يعني يا ماشاءالله أول ما يجي أي أجنبي البلد أول حاجة بنفتخر اننا علمناها له ه ى الشتيمة ...و مش أي شتيمة اللي من النوع الأبيح كمان ...

طب تعالوا كده ندخل شوية في القاموس هنلاقي قمة التنافض ...يعني نكتة جات لي من فترة و كانت حقيقة إنه من عجائب الشعب المصري ان وحياة أمك أو روح أمك شتيمة و رحمة أبوك للتوسل فعلا .. مع ان في الواقع كل واحد بيموت في تراب رجل أمه و ما يقبلش عليها الهوا الطاير ...إنما لو حد قال (ياللا يا ابن الكلب...)بيضحك أوي و دايما بتستخدم في التهريج ... 

لو صنفنا الشتايم هتلاقي كل ما هو يبدأ ب يا ابن أو يا بنت بيدخل في قائمة الأعراض و الشرف و بيجرح و يصيب و دايما بيؤدي لمصايب و خسائر أحيانا في الأرواح ...

و كل ما هو من لفظ واحد و عادة نوع من أنواع الحيوانات ...بيعدي ...يعصب ساعات بس بيعدي و ساعات تانية بيؤدي لابتسامة باردة و صفرا و تناحة لا توصف ماشاءالله و كأن اللي بتشتموا بيقولك (الله يا سيدي قول كمان)...مع ان لو ركزنا هنلاقي ان الحيوانات اللي بنستخدمها في الشتيمة كلها مميزات ياريت تبقي في البني آدم ...يعني الكلب مخلص ووفي و صاحب صاحبه...الحمار بتاع شغل و بس...البقرة و الجاموسة كائنات منتجة و من غيرها نموت من الجوع ...وهكذا 

تعالي بقي لشتايم الصفات ...دي بقي جميلة أوي كأنها هوا معدي و لا بتأثر و لا بتسمن ولا بتغني من جوع ...مع انها الأكثر مصداقية يعني أما بتقول لواحد يا غبي ...بيقبي فعلا عمل تصرف غبي ...غالبا بيكون رد فعله السيلم انه يعمل نفسه مش سامع عشان هو يا حرام فيه الصفة هيدافع و لا ينكر و لا يعمل ايه ...زي قلته أي فعل ...

الكبيرة بقي و اللي حقيقي غير مفهومة بالمرة شتيمة الأعضاء...أعضاء الجسم طبعا ...و دي للأسف لو ركزنا فيها هنلاقي ان احنا بنشوف حاجات في الحقيقة لا تقدر بتمن ...وعشان الرقابة و عشان أنا بنت و عيب أتلفظ الألفاظ دي علنا كده ...عندي بس تساؤل واحد ليه دايما بنقول (تييت أمك) مع ان في الواقع لجزئية دي غالية على الجنسين و في بعض الأوقات بيدفع فيها فلوس كتير أوي ...(أسفة بس كان لازم أوضح) 

نفس الشئ في الناحية التانية (قصدي عند الرجالة) بس أعضاء مختلفة ...المهم انها بتستخدم كتير للتعبير عن الاعتراض أو الشتيمة أو غيره ...وفي الحياة و الواقع هى أغلى من عنين الراجل و عايش عشنها يمكن ...

لو كل واحد ركز شوية قبل ما يشتم و جرب يبدل الأعضاء بأعضاء تانية هيلاقي الموضوع خرج من اطار الاهانة اللي بتخسر الناس بعضها و بتكلفهم كتير ...و بقي في اطار التنفيس يعني ممكن لو حد عصبك أوي ممكن تزعق و تقول ( ياللا يا كبد أمك ) أهو خرجت الشحنة السلبية و هو محسش الاهانة و الموضوع عدى على الطرفين و هكذا ... 

اللي انا كتبته ده حل أنا أول واحدة هحاول جاهدة اني اطبقه ...عشان للأسف أنا زي الأجانب فرحت أما اتعلمت ازاي اشتم و اخرج من نطاق شتايم الحيوانات و الصفات للنطاق الأعراض و الشرف  ...

تفاؤلو بالخير تجدوه

السنة اللي فاتت اما قررت ابقي ايجابية و ارمي اي حاجة سلبية ورا ضهري ...وقعت بين ايدي جملة حبتها أوي و حسيت انها علامة و اني ماشية في الاتجاه الصحيح ...

انا مش فاكرة الجملة دي كانت ضمن ايه ...يعني هل كان دعاء ولا حكمة ولا حديث شريف ...المهم انا حبيتها و اعتبرتها ال guide في حياتي ....تفاؤلو بالخير تجدوه ...حلوة و سهلة و سلسلة و بتشرح نفسها ..

فعلا نتمني الخير هنلاقيه ...نستني الخير هنلاقيه ...نطلب الخير هنلاقيه ...لأن ربنا مش بيبعت إلا كل خير ...

و العكس صحيح يعني اللي قال (اللي يخاف من العفريت يطلع له ) عنده حق ...و اللي قال ( متقدر ش البلا قبل وقوعه) برضه عنده حق ..لأن و عن تجربة الواحد أما بينبر في حاجة و يفقر ما يلومش إلا نفسه ...و الكلام ده بحالو اقنع بيه نفسي بقالي كتير ...لكن نقول ايه بقي في طبع البني أدم الزفت ...مافيش حاجة تغيره إلا أما يأخد فوق دماغه ...

ده غير ان الطاقة السلبية بتولد طاقة سلبية ...بس ده طبعا مايمنعش (ان من خاف سلم) و الواحد برضه لازم (يداري على شمعته عشان تقييد)...و كمان المقولة الصحيحة جدا ..(استعينوا على قضاء حوائجكم بالكتمان فإن كل ذي نعمة محسود) ...

هو فعلا الكلام يبان عكس بعضه لكن ده يرجعنا لحقيقة ان الانسان فيه كل حاجة و عكسها ودي كانت اول حاجة كتبتها ووصفت بيها نفسي و لسه مصممة عليها ...

عشان أكبر دليل على اللي انا فيه من كل حاجة و العكس اني مؤمنة بجملة عايشة بيها بقالي سنة أو أكتر دايما شايفها قدامي و دايما بقولها لكل اللي حواليا و فعلا أثرت بيها على ناس كتير ...لكني زعلانة و مكتئبة الأيام دي و حاسة ان كل حاجة مقفلة قدامي ...(تناقض) 

عموما أنا (المتفاءلة) طول الوقت في صراع معايا أنا (المحبطة) و بحاول بكل الطرق إن أنا (المتفاءلة) أهبط أنا (المحبطة) و ياسلام لو أقدر أطرد أنا (المحبطة) بره حياتي ,,,عشان حقيقي الجملة السحرية دي خدمتني كتير و كل أما أفكر أغيرها بالاقي نفسي يارجع لها بلا وعي ....

تفاؤلو بالخير تجدوه ...حبو الخير تجدوه....ابحثو عن الخير تجدوه....و مافيش حاجة اسمها خير تعمل شر تلاقي عشان مهما عملت من  خير هيترد لك خير بس مش لازم من نفس الشخص ولا لازم نفس الخير ممكن خير تاني و شخص تاني ...

و رب الخير لا يأتي إلا بالخير .....