صباح الخير انا نازل استشهد

هو أنا بيتهيألي ولا الناس بقت بتمشي في الشوارع و هى طالبة الشهادة و مبقتش حياتهم فارقة معاهم ....يعني أنا مش قادرة أحدد هل دي لا مبالاة ولا بما ان كلمة شهيد بقت بتتكرر كتير على مدار السنتين اللي فاتوا فالناس فاكرة ان أي موتة هتتعرض لها هيطلق عليهم لقب شهيد في شهادة الوفاة ....

يعني السؤال بطريقة أوضح عشان مبقاش ظالمة حد الناس اللي بتوقف على مطلع الدائري عشان تركب مواصلات و الناس اللي بتعدي الطريق السريع و الناس اللي بتتمشي و الاشارة مفتوحة عند هايبر أوكتوبر و الناس اللي بتمشي وسط العربيات بالطول و كأنهم هيخترقوا العربية ....لأ و الناس اللي بتقرر انها تنزل من عربية في وسط طريق سريع و اللي بيصدر عياله للعربيات و هو بيعدي الشارع هل كل دول في دماغهم انا نازل أموت شهير و لا دا تأثير أفلام الأكشن الكتير اللي هيوليوود غرقتنا فيها ولا ده نوع من أنواع الاستهتار و ماشيين بمبدأ ما تخلي بالك انت ...

يعني لو حد من دول اتخبط لازم يكون الغلط على اللي سايق انه مشفش الجثة اللي بتعدي و نزعل و نلوم على الحكومة و نبهدل الدنيا طب ليه ...ليه مبنخفش على حياتنا و نحاول ناخد بالنا بدل من لوم غيرنا ...يعني لو ماشي على الرصيف استحالة عربية تيجي مخصوص تخبطك و تنزل تاني 

لو بتعدي و الطريق فاضي استحالة عربية تيجي من آخر الدنيا تخبطك ماهو مش need for speed يعني اللي احنا عايشيين فيه و مش من الفراغ اللي في الشوارع البلد زحمة و بتزيد زحمة كل دقيقة و مبقاش فيه مكان فاضي يستحمل عجلة 

و عشان مبقاش طبقية مش بس الناس اللي ماشية على رجليها هى اللي طالبة الشهادة كمان الناس اللي في العربيات واضح انها يا طالبة الشهادة يا طالبة فلوس التأمين عشان مش طبيعي ان احنا في بلد كل شوارعها اتجاه واحد و احنا مبنعملش حاجة غير اننا نمشي عكسي و بس و برضه في الاماكن اللي مينفعش تماما ان احنا نمشي عكسي فيها أو نكسر اشارات ... زي تاني مطالع الدائري و الطرق الصحرواي و السريعة و الكباري ...

احنا البلد الوحيدة اللي  عملت اشارة في طريق سريع و مطبات على كوبري أفتكر و مطبات في parking المولات و في الشوارع الجانبية الضيقة و لو ان المطبات دي المفروض عشان تهدي السرعة فالحقيقة مش قادرة أفهم مين هيجري في ال parking إلا اذا كان بيستعرض أو مشارك في رالي الفراعنة ....

نصحتي للمسئولين عن الشوارع و المرور عشان نتجنب الظواهر الغير مفسرة بقي لها فترة:

1- نلغي اشارات المرور و نوفر سحب كهربا على الفاضي و نحولها لشاشات عرض اهي تسلي الناس في الزحمة و ممكن كمان تكون هى سبب من أسباب الزحمة و ممكن نكتفي بعسكري المرور لو متأزمين أوي و محتجين حد يقوفنا و يحركنا و لو ان ده كمان ساعات كتير بيعطل ما بيقدمش خصوصا اللي بيقفوا على الكباري رغم ان المتعارف عليه ان الكباري اتعملت عشان نهرب من زحمة الشوارع و ان احنا اكتر بلد فيها كباري 

2- نبوذ على الشعب فرحة انه يمشي عكسي و نخلي الطرق كلها رايح جاي و بكده هنتجنب الأفش و برضه هنتجنب الزحمة الغير منطقية بسبب ان واحد داخل غلط و مصمم يرجع 55 واحد داخلين صح و ممكن كمان ينزل يبجح و يتخناق 

3- نلغي الرصيف بما ان الناس مش بتستعمله و بقي عبارة عن سويقة و بكده منقدرش نلوم الناس انها ماشية في الشارع مش على الرصيف و في نفس الوقت هنوفر مساحة أوسع و بالتالي العربيات هتلاقي مكان تركن فيه بدل ما بنركن صف عاشر و نضيق الدنيا على بعض و برضه نبجح في بعض و نتخانق 

بالتلات حلول دول ممكن نخف شوية الزحمة و نخفف كمان عدد الشهداء و نفوت الفرصة على بعض ان احنا نتخانق و نضيع نص عمرنا بنزعق و نوقف الطريق زيادة أكتر ماهو واقف لأن الخناقة في الطريق للأسف أو الحادثة أو أي غلطة مبتبقاش بين اتنين بس بتيجي على دماغ الكل يعني لو الطريق وقف في شارع مصدق عشان اتنين اتخنقوا العطلة بتوصل لمحي الدين ...