قليل البخت

فعلا قليلة البخت و مبجيش إلا عند القرد بكل تفاصيله و اشمه يعني يوم ما اتكتب لي أعمل عملية هتغيير حياتي و تدخلني عالم جديد عليا كان المقابل اني ابقي من غير شغل ...قلت و ماله دي برضه صحتي و أهم و أهو ربنا عوضني بشغل تاتي صحيح بعيد كل البعد عن مجالي بس أهو رزق و اتكتب لي ...عملت العملية الحمدلله و اتستر بالشغلانة الجديدة و اللي كنت طايرة بيها اول شهر ايه الحلاوة دي ايه التقدير ده ايه الاستقرار ده و كمان لاب توب و كمان عقد لمدة سنة يا سلام الحمدلله قرار مناسب مع العملية ....لكن ليه نتنهنا هو شهر واحد و الشغلانة الجديدة بقت محتاجة مصاريف اكتر من مصاريف يومي و اللي داخل منها رايح علي عربية و دكاترة و علاج أه العملية نجحت و جابت نتيجة كويسة اوي كمان بس العين ماشاءالله إذا كانت عيني ولا عين غيري متتوصاش ركبتي مره كتفي مرة شعري بيقع اروح افتح المركز اللي شغالة فيه صباعي يتحشر في الحديد اعمل حادثة عربية اخد كدمة في رجلي شهر ....كلها ابتلاءات 
بس آخرهم اللي صعب شوية عليا أه ما هو أصل الشغلانة اللي انا كنت فيها كان كلها ستات و كل واحدة تدخل بتقول تعليق عينيك حلوة رموشك حلوة لون شعرك ماشاءالله أمورة كلام مش بسمعه من الرجالة بس معرفش انه هيجيب أجلي ...و جاب فعلا جاب صداع نصفي استمر اسبوعين قفل على عينيا اليمين و خلاني ماشوفوش و بدأت 2015 معاها طابور دكاترة و طرد من الشغلانة اللي هى  مش شغلانتي و اللي كنت قبلتها عشان أأمن نفسي ايوة طردوني عشان عيانة و عشان صحبي اللي هو جاب الشغلانة و كان طاير بيا و اللي نفسه هو اللي طردني شايف ان طريق كلامي خنقته و مش قادر يستحملها على اساس اني مراته ....
لا 2015 مكتفتش بكده بعد السحلة مع الدكاترة عشان نرجع النظر اللي راح و العين سليمة و جرعة الكورتيزون المكثفة قدرنا نوقف السوء بس معلجناش الدنيا و لا اتحسنت و طبعا ده في حد ذاته انجاز ...نيجي بقي على أهم مفاجاة و اللي رجعتني اكتب تاني بدل ما اتجنن كنت قلت بالغلط ان 2014 كانت حلوة معايا و قدمت لي كتير و هى فعلا قدمت لي كتير و كان فيها نقط تحول كتير اوي في حياتي و جات في آخر شهر فجأتني بإنسان دخل بس عشان يغير كل حاجة في دماغي فجأة يعني واحد ظهر يوم 28 ديسمبر فلسطني اصغر مني ب 7 سنين مثلا برج العذرا ظابط كل دي حاجات انا ببعد عنها أصلا طول الوقت عندي تحفظات عليها المهم لاقيته دخل الحياة بمنتهي الاحترام اللي في الدنيا قلت لأ مش شرط اكون صح جايز اكون غلط  ليه ل نقرب و نتعرف و اخدنا ايه يعني احنا من المصريين ماهما الرجالة في كل مكان فيهم الوحش و الحلو المهم يدخل مع مفاجأت 2015 انه يبان الحاجة الحلوة في وسط الضرب اللي من يوم 1-1 ده عشان يجي يوم 3-1 يفجاني بمشاعر ثبتتني و حسيت كاني فعلا في فيلم من الأفلام الهندي اللي انا مدمنها و يقول انه حبني و انه عارف ان دي حاجة مستحيلة عشان فلسطيني و ظابط و صغير و ان مدة تواجده في مصر 6 شهور بس 
كان عارف انه مستحيل بس كانت عنده الجراة انه يتكلم و يقول بصراحة و ده كمان عجبني أكتر و طبعا زي الهبلة قلت و ايه المشكلة حد عارف في ال6 شهور او بعدها ايه اللي ممكن يحصل مردتش صراحة بس كان واضح اني مش معترضة و بدأت العلاج و معاها المفروض قصة الحب اللي استمرت 5 أيام زي كورس الحقن لأن مع آخر حقنة حصل تحول رهيب و مش مفهوم هو شرح وجهة نظره و أنا احترمتها اوي أول ما قلها و احتراما له و لوجهة نظره و للموضوع ككل مش هكتبها بس هكتب اللي حصل لي من ساعتها يعني بعد ما كنت محترمها اوي و احترمته هو شخصيا بدأت الأفكار السودة تتنتط في دماغي ...
يعني هو أنا اللي جريت وراك هو انا اللي قلت لك تعالي و نبقي مع بعض هو الرجولة بتقول انك تسبيني و انا عيانة و من غير شغل و تختفتي هو انت كده كده ماشي كمان 6 شهور استعجلت ليه تمشي دلوقتي ....أنا مكنش لازم ابقي سهلة و اقبل اي حاجة ....هى الرجالة كده مبتحبش غلا النكدية و يجروا و راها كمان انما اللي باين انها سهلة و الحياة بالنسبة لها lovely عادي تاخد فوق دماغها ....أنا مكنش لازم أما يقولي نبعد شوية مكنتش قولت براحتك كان لازم اعمل دراما و اطلع الاشكيف المخيف  ....طب كان لازم أعمل بلوك ....كان لازم و كان لازم و كان لازم ....
لأ هو ماكنش في اي حاجة لازم تتعمل غير اني قلت له براحتك انا مش هاجبرك على حاجة عشان انا مينفعش اجبر حد على حاجة هو اللي جه و هو اللي مشي يمكن كويس انه جه عشان يغير مسلمات في دماغي و كويس انه مشي يمكن قبل ما كان يحصل فعلا دارما انا مش قدها لا دلوقتي و لا بعدين  انا بس مش مصدقة ان يوم ما يجي حد يكون فلسطيني ...أصغر مني....ظابط....برج العذراء....وكمان مش عايش في البلد دي 
هل ممكن يكون في قلة بخت اكتر من كده