أيوه عقدة الخواجة...الخواجه ده بقى كل اللي مش بيتكلم مصري على فكرة مش بس الاجانب...كل من خارج حدود البلاد بقى عملنا عقدة...عقدة في اعجابنا الشديد لعاداتهم و تقاليدهم و تصرفاتهم و قواعدهم و في نفس الوقت انتقادا الشديد نفس الحاجات اللي عجبتنا...
امتى بيعجبونا ..
أما نيجي نتكلم عن الجواز الرجالة طبعا معجبين عشان الجواز سهل و بسيط و مافيش فيه كلاكيع و لا مصاريف كتير
لكن امتى بننتقد أما تيجي الست تقوله مثلا حبيني زي مهند التركي أو كريم بتاع فاطمة أو أي جثة أمريكاني شفتها في الافلام يقولها ده تمثيل و لما تبقي انتي اصلا نور أو فاطمة أو جنيفر لوبيز
اللذيذ في الموضوع إن اللي بينتقد عادة عنده اسطوانه واحدة الاجانب باردين و معندهمش نخوة و لا رجولة ...
عارف النقد ده ليه عشان الاجانبي بيسيب مراته أو حبيبته أو بنته تلبس اللي يرحها سواء كان موضة أو لأ و عشان كمان بيسبها تسلم على الرجالة زي ما بتسلم على الستات بتبوس و تحضن و عشان فيه في بلاد معينة ناس بتحاسب على اللي بتاخده و بتطلب على قد ما تحتاج من منطلق العملية و إن الواحد لو مش معاه مش هيتفشخر على الفاضي
إنما تعالي يا برنس انت وهو نشوف الواقع ...الواقع إنك بتريل قدام أي كتف ابيض اجنبي اللي بتشوف إنه عيب يظهر من بنت مصرية و بتبدأ تتخيل عنها حكايات كلها شمال ...الحقيقية إن اللي انتى شايفة مش راجل عشان سيبها بتبوس و تحضن هو أكتر منك رجولة عشان عمره ماشتمها و لا كان في مكان مثلا و مشي قبلها أو زقها في الزحمة أو أي تصرف من تصرفات قلة الذوق اللي
بقت منتشرة ماشاءالله زي الانفلونزا كده
أه و بالنسبة لكل واحد يدفع لنفسه فحضرتك لا مؤاخذة بقت تخليها تدفع لنفسها و لنفسك و تسيبلك مصروف كمان عشان البنزين و السجاير يعني ماشاءالله عديت الخواجة بمراحل
نيجي للتقيلة بقي الخواجة اللي ليل نهار شغالين بالنا بيه بيعدي ياخد الموزة حتى لو هيشوفها مرة واحدة من باب البيت أو بيتفق على مكان مناسب ليها و بعد الخروجة يوصلها لباب البيت
حضرتك بيقت بتعمل ايه دلوقتي بقيت بتكسل تطلع بره باب البيت و لو الموزة عجباك و ميت عليها بتبقي عايز تشحطط اللي جابوها و اما بتفتح بقها و تقول تأخير بتعمل فيها توم كروز و بتجري تحلق لها بس عشان متهزهاش و تشوفها و غالبا بتقطع معها عشان توفر رسايل اللي هى اصلا ببلاش ده غير انك بتوفر مكالمات و ساعات بتبعت على الفيسبوك و مش بعيد تتكلم من عليه عشان ببلاش
...هو الخواجه قال كده !!!! ده انت تفوقت على الخواجة و علمت عليه و فزت بلقب خواجة الخواخة يا راجل أو ملك الخواجات
ياريت يا ريس و برنسيسة قبل ما نبص للخواجات نبص لنفسنا هما عملوا اللي نفسنا فيه فبلاش شغل عيني فيه و أقول ايخيه ده عشان مش هيودينا أي حته و هنفضل طول الوقت عندنا العقدة و طول الوقت بنحاول نكون زيهم مع ان احنا ممكن نكون احسن منهم ....
لو البرود شكله زي قصص الحب في الافلام الامريكاني أنا عايزة ابقي تلجه
لو الرفق بالحيوان رفاهية أنا عايزه ابقي مرفهة
لو التفاؤل خرافة أنا هاخرف ليل نهار
لو التجربة جنان أن أم المجانين
لو الرجالة كلهم شبهك قاعدين يربوا في شعر صدرهم و ينتقدو و يقولوا و ميعملوش أنا ممكن اربي شنبي و اقوم بدورك عادي جدا اصلك زي قلتك في حياتك قبل حياتي
No comments:
Post a Comment