انتى ليه مش متجوزة لحد دلوقتى؟؟!!
انتى ليه مش متجوزة ؟
انت بجد مش متجوزة؟
انت اتجوزتى قبل كده؟
سؤال باسمعه اكتر من النفس اللى باخده فى اليوم ....سؤال كان مقتصر الاول على الجنس الخشن حاليا داخل فيه كل المخلوقات ...جنس ناعم ..جنس خشن...جنس تالت..اه والله حتى الجنس التالت بيسألنى و بكل بجاحة يقولى ليه...كل الأعمار بتسألنى آخرهم شاب عنده ٢٠ سنة و سالنى زى الراجل اللى من عمرى او اللى عينه منى...
انا فاضل الحيوانات تسألنى نفس السؤال...
بس تعالوا كده نسمع حوار خلقته فى عقلى الباطن بينى و بين اول راجل هيسألنى السؤال ده...
هو: متجوزة؟
انا: لأ
هو: مطلقة
انا: لأ
هو: كنتى مخطوبة ومحصلش نصيب
انا: لأ
هو: اه رافضه الجواز
انا: لأ
هو: بترفضى العرسان اكيد اتقدملك ناس
انا: اطفحهم لو شفتهم اصلا ...لأ ولا عمر حد قرب لى
هو: بتاعت شغلك و بس
انا: لأ ...عندى شغلى و عندى حياتى اللى ممكن أعيشها عادى
هو: متنكة و حاطة شروط صعبة
انا: والله حطيت من سنتين شرطين بينى و بين نفسي و منزلتش بيهم إعلان ...قلت عايزة واحد بيصلى و مش بتاع سيجارة وكأس
هو: بتطلبى المستحيل يعنى
انا: متطلبتش اصلا
هو: هو ايه مافيش رجالة ولا الرجالة اتهمت
انا: والله حضرتك لو بتقابل رجاله اسألهم
هو: عندك حق الرجالة ماتت فى الحرب
انا: طب ممكن اسألك سؤال انت متجوز
هو: اه
انا: ليه
هو عشان دي سنة الحياة
انا: ليه
هو: عشان اعمل بيت ويبقى عندى ولاد و استقر
انا: ليه
هو: عشان عندى مطالب و احتياجات
انا: طب لو مكنتش لاقيت حد تتجوزه كنت هتعمل ايه
هو: مافيش حاجة اسمها ملاقتيش لو انا مش لاقى او مش فاضي اهلى هيدوروا اصحابى هيرضوا ...سهلة
انا: طب لو ملاقتيش حد مناسب او عجباك هتعمل ايه
هو: هاشوف فى اى مكان و الاجانب بيعشقوا الراجل المصرى انا ممكن اطلبها بالتليفون عمرها ما كانت أزمة...
انا: هى دي الأزمة ...ازمة واحدة زيي لو محدش طلبها او رشحها مش من حقها تدور وتتصرف ولو لجأت لأى وسيلة غير التقليدية هيتقال عليها احلى كلام مش بس من القريبين ...ده من القريبين و الغرب و الراجل اللى هيقع فى قرعتها و المجتمع والناس وبرامج المرأة ووائل الابراشى ...
ارحمو من لم تأتى محطاتها بعد ...ربما غير مقدر لها الانتقال حاليا بلا أسباب معلومة...
اما انا اصلا ساكتة و عاملة نفسي نايمة انتو مهتمين ليه. ..عندك عريس هاتو و
No comments:
Post a Comment